Plantun de Prouvènço

Pèr coumpara dos planto d'encò nostre

Tamarix africana & Plumbago europaea

Tamarisso(-d'Africo)

Tamarix africana

Tamaricaceae

Autre noum : Tamaris.

Nom en français : Tamaris d'Afrique.

Descripcioun :
Aquelo tamarisso s'atrovo dins li palun sala, en ribo d'aigo e li marlo proche de la mar. Es un aubret un pau mai fort que Tamarix gallica emé uno rusco pu sourno. Se n'en destrìo majamen pèr si flour qu'an de petalo mai longo (>2,5 mm) e peréu que vènon sus li ramo de l'an passa avans lou crèis di ramo de l'an. Li flour soun toujour bèn sarrado.

Usanço :
La rusco èi diuretico, astringènto, sudorifico e aperitivo.

Port : Aubret
Taio : 2 à 6 m
Fueio : aguio escaumo
Tipe bioulougico : Faneroufite
Cicle bioulougico : Planto renadivo

Gènre : Tamarix
Famiho : Tamaricaceae

Ordre : Caryophyllales

Coulour de la flour : Roso
Petalo : 5
Ø (o loungour) flour : 2 à 3 mm
Flourido : Printèms Ivèr

Sòu : Ca
Autour basso e auto : 0 à 50 m
Aparado : Noun
Remarco : Planto de coustiero
Mars à mai

Liò : Ribiero - Palun sala - Marlo
Estànci : Termoumediterran à Mesoumediterran
Couroulougi : Estenoumediterrano-Ouèst
Ref. sc. : Tamarix africana Poir., 1789

Erbo-di-rascas

Plumbago europaea

Plumbaginaceae

Àutri noum : Erbo-enrabiado, Bagoun, Erbo-de-la-rougno, Erbo-di-couquin, Malo-erbo.

Noms en français : Dentelaire, Malherbe.

Descripcioun :
L'erbo-di-racas, mens coumuno qu'à passa tèms, trachis en ribo de camin, i pèd de muraio e dins lis escoumbre ounte flouris amé de poulìdi flour vióuleto, à la fin de l'estiéu. Es uno planto eisado de recounèisse emé si flour e si fru pegous qu'arrapon li péu e li teissu.

Usanço :
Èi couneigudo au nostre pèr garris la rasco. Ramentèn qu'aquesto malautié de pèu e de péu s'aprèn à de champignoun coume Microsporum canis. Freta la bèsti emé d'òli de bagoun (adouba en fasèn bouli la planto dins l'òli). Se dis peréu qu'en mastegant la racino, apaisso li ràbi de dènt (erbo-enrabiado)-TdF. Pamens se n'en fau mesfissa que fretado sus la pèu pòu douna d'enflamacioun.